Jak peturi adat budaya

Advertisement
Jak peturi adat budaya

Salam alaikum pujo kerabbi
Rahmat ilahi tateme rasa
Selawet salem kebaginda nabi
Syefeat nebri dipadang masya

Ulon kemarang lam sion keretah
Bacut lon pegah ben etem baca
Kalheh lon kalon jet-jet daerah
Lon kenek pegah ragam budaya

Tabaca buku tadengo syae
Haba yang lazem bak ureng tuha
Dari awaikon acehnyo lahe
lethat dum kawo lam sikrek haba

Turi meturi tajalin uhwah
Bek pesom muka pedehlah rupa
Blahnow gurute blahdeh selawah
Nabacut kilaf tameah desya


Sebetoi rakan aceh indah that
Rata daerah ragam budaya
Beda metuto ngon istiadat
Nyan tanda rakan acehnyo kaya

Namanyum tika ladom peh karah
Nachit yang ladom jithe ngon pala
Macam masakan pih beda kuah
Jithe cirikhas aceh mulia

Pekeeueng  kuah boh campli putik
Pedas bak bibi cukop merasa
Blahdeh selawah megah kuah plik
Kamoe dibarat pih na meucoba

Lethat kenebah aceh lon sayang
mebek mesampo tuwo tajaga
adat budaya pethen le cut bang
yang ka gewareh lek raja-raja

ladom digampong lethat sejarah
yang gohlom megah jithe ulua
tanyong temanyong bak mi ngon ayah
mangat tatepe kiban pekara

tabangun aceh ngon hukom islam
petunyok jalan mangat gereza
belagai awai yoh masa silam
masa kerajen iskandar muda

meen sedate ranup lampuan
rapai daboh hayut bak mata
jibuka silet sep sigo hantam
nyankeh pendekar pembela bangsa

ladom na male oh gemetuto
Pegah lon gampong dimalaisia
Gaya bahasa metilo-tilo
Pahai gopnyan asli dilangsa

Natom tejadi mise nyan rakan
Tanyo yang dengo payahboh muka
Pekeh yang kureng aceh nyow insan
Sampe pekateuen medenyan rupa

Budaya barat rap rata sago
karoh tamengui hana terasa
lage sang tanyoe hana ata dro
gadoh tatiru budaya lua

bak mengui  linto ngon dara baro
gaya mepesta mebeda-beda
murah jelame beget metuto
ngon calon tuan tanyong pehaba

namegah bacut gampong merandeh
tajak besare  takalon nyata
bek awai megah bak ureng gampong jeh
getanyo yang tau tanyong supo atra

turi budaya beserta adat
luah wawasan oh tacerita
kadang chit singoh tajak ubarat
tabrithai siat nibak obama

kesinyak aceh betapeturi
adat aseli mise pka
tarian saman dengon sedati
lethat atraksi yang dipelomba

beu ek takembang adat lam nanggro
oh na acara ta selenggara
singoh oh jithe bak saboh uro
le that singgahan parawisata

peuturi Aceh luwa daerah
mangat disinggah oh troh kutika
tapeungui Aceh dengan mareuwah
peukaten adat dalam agama

oh visit Aceh beuneupeduli
lam uteun klek-klok ci neuperiksa
sebab le mantong produk yang asli
mangat dituri le sinyak dara

budaya Aceh cukop meutuwah
nilai sosial serta agama
tagotong-royong bantu yang susah
peumulia jamee soe-soe yang teuka

sikap lagenyo mantong terjadi
bekputoh talo bak ureung tuha
mehan tajaga tabiat asli
puekeuh takeubah keu generasi muda

pakiban cara bak peumerintah
adat budaya beu ek tajaga
pue tablo gembok mangat bek teuhah
supaya aman bek rhot u luwa

beutoi hai umi yang ulon bi thei
tasayang bacut akan budaya
bukan keuh lon nyoe jino sok lebei
menyo han neupateh ci nedengo ulon cerita

di Indonesia berita awai
adat budaya rap rhot u luwa
dipegah batek lagunya ata kei
menyo ka menan rhoh tamedawa

nyan keuh lon pesan keu rakan-rakan
lon keunek jak wo uro ka jula
tajunjong tinggi nilai warisan
samboeng hai rakan jok kepusaka nj

Jipekhem le ngon han meupu suot
Petra kabalot ka kaprak haba
Bek patah semangat hantem lon suroeot
Pane tatepe mehan tacoba

Kajeut keuh oh no haba lon tuleh
Lon lakee meah bak Allah ta’ala
Wasalam rakan teurimong genaseh
Nyokeh yang akhe peunetop haba.


Penulis,
Zulhelmi, putra  Meulaboh
No. Hp: 082367385424

FB: D’zuel_hilmie@yahoo.co.id
Ads